Wanneer ‘n mens ‘n dankbare terugblik neem oor ‘n periode van honderd-agt-en-dertig jaar, dan gee jy onmiddellik eer en dank aan God vir sy verbondstrou aan sy verbondsvolk. Terselfdertyd gee ons erkenning aan voorgangers in diens van die Here, onder andere leraars, ouderlinge en diakens, toegewyde mans en vroue en jongmense wat met soveel onverdrote ywer ‘n betekenisvolle bydrae in die gemeente gelewer het.
Onvergeetlike momente, as komende van God, het inderdaad ons gemeente in staat gestel om ‘n reuse aandeel te hê op kerklike, nasionale, politieke sowel as ekumeniese terrein. Ja, VGK Malmesbury het voorwaar geestelike droogtes en krisisse beleef, maar die oorwinnings en geestelike hoogtes was veel meer as laagtepunte.
Die sin en betekenis van kerkwees lê egter nie in die gryse vergetelheid van die verlede nie, maar in die blou ruimte wat God vandag tot ons beskikking stel – derhalwe moet ons toekomsgerig wees. Deesdae kyk ons positief vorentoe met optimisme en geloofsverwagting, wetend dat God trou bly aan al Sy beloftes. Hy wie ons die afgelope honderd-agt-en dertig jaar gedra en gelei het, sal ons ook triomferend en oorwinnend die nuwe era indra.
Leraars In Die Bediening Van Die Gemeente
'n Totaal van 18 leraars het ons gemeente bedien naamlik:
LERAARS | TYDPERK |
---|---|
Eerwaarde Daniël Johannes Joubert | 1881 – 1893 |
Eerwaarde Jan Pieter De Villiers | 1893 – 1898 |
Eerwaarde Stephen B. Weich | 1899 – 1909 |
Eerwaarde Carel Johannes Grové | 1909 – 1925 |
Eerwaarde PJ van der Walt | 1925 – 1939 |
Eerwaarde James J. Higgo | 1940 – 1944 |
Eerwaarde Chistiaan Johannes Liebenberg | 1946 – 1960 |
Eerwaarde Charl Francois Sieberhagen | 1958 – 1960 |
Eerwaarde Roelof Hendrik Venter | 1960 – 1963 |
Ds Ockert J. Erasmus | 1961 – 1963 |
Ds David Petrus Botha | 1964 – 1968 |
Ds Eberhard Karl Johannes Schreve | 1965 – 1989 |
Ds Pieter Eduard Du Toit | 1968 – 1971 |
Ds Ockert Johannes van der Walt | 1974 – 1977 |
Ds Johan George Botha | 1978 – 1980 |
Ds Michael S Lemboe | 1981 – 2014 |
Ds Eugéne E. Beukes | 1988 – 1996 |
Ds Quentin Shaun Minnaar | 1 September 2018 - Hede |
Die VGK Malmesbury leef op die oomblik in ‘n gloed van Christelike blydskap. Die gemeente het besef dat ‘n bietjie meer blydskap sal beslis van hierdie wêreld ‘n beter plek maak om in te leef en te werk. Maar ons moet ook goed kan onderskei tussen die blydskap van God en die blydskap van die wêreld. Die wêreld se blydskap is soms soos die van die verlore seun. Dit gaan verby. Die blydskap van God is blywende vreugde van die feesmaal in die Vaderhuis waar ons tuishoort.
Ons as gemeente glo dat die opdraande en steiltes van gister afdraande vir môre word en dat die VGK Malmesbury van krag tot krag en van oorwinning tot oorwinning gaan.